PBL ikastaroa lehen hezkuntzako irakasleentzat

Urriaren 25ean PBL (proiektuen bidezko lana) ikastaro/mintegiko lehen saioa izango dugu Barakaldoko berritzegunean.

Badakigu urrian zehar lanez gainezka daudela ikastetxeak: bekak, Urteko Plana...

Zereginen artean, irakasleek ere programazioak berriztatzeari ekin diote. Irailaren 6an, Heziberri saioan, jorratu genuen unitate didaktiko baten garapena urratsez urrats eta adibideak jartzen. Antolatzaile grafikoa ere luzatu genizuen baliagarria izango zelakoan. Horretaz gain, hori guztia biltzen duen SITEA ere aurkeztu genuen.

Azken astean galdetu digute arazo-egoera baten inguruko unitate didaktikoa nola egin. Ba, erantzuna PBL ikastaroan duzue, hain zuzen. Heziberri saioan azaldu genuen bezala, arazo-egoera edo erronka PBLen bidezko unitate didaktikoaren abiapuntua da.

Beraz, zuzendaritza taldeei esan genien bezala, lehen hezkuntzako irakasleei (tutoreei, batez ere) gonbidatu nahi zaituztegu parte hartzen datorren astean hasiko den ikastaroan. Bertaratzen direnek beraien ikastetxearen lantaldeekin batera apurka apurka berriztatze horrek ekartzen dituen aldaketak ulertuko dituzte eta praktikan jarriko dute.

Bestalde, gure praktika doitzeko beharrezkoa da norabanako konpromisua: sekuentzia/unitate didaktikoa diseinatzearena eta zuen ikasleekin aurrera eramatearena. Bi osagaiak ezinbestekoak dira formazio eraginkorra lortzeko.

Bideo labur hau, gazteleraz, uzten dizuegu gakoak ezagutzeko:

Helbide honetan duzue izena emateko inskripzio orria.

Amaitzeko, 30.Jardunaldi Pedagogikoetako blogean duzue inskripzioa egiteko esteka. Aurten, PBL-a izango da gaia eta emalea Fernando Trujillo.

Barakaldoko Lehen Hezkuntzako irakasleentzat antolatutako Heziberri 2020 inguruko lan-saioa

Irailaren 6an, ikastetxe publikoak zein itunpekoak deitu genituen Clara Campoamor zentro zibilkoan elkartzeko lehen hezkuntzako irakasleek Heziberri 2020k dakatzan nobedadeak ezagutzeko eta, batez ere, elkarlanean, eredu pedagogikoak zein dekretuak adierazten dituen metodologia eta programazioak praktikatzeko.

Zeregin asko daude ikasturte hasieran baina, ikasleak zentroetan hasi baino lehen, aukera paregabea dugu lau ordutako saioa burutu ahal izateko, eta, batez ere, ahalik eta dozente gehiago bertaratu ahal izateko. Barakaldoko ikastetxe guztietako irakasleak hurbildu ziren, 220 lagun inguru. Horrek asko poztu gintuen eta eskerrak eman nahi dizkizuegu hurbildu zineten guztieei bai, eta zentroen zuzendaritza taldeei ere.


Jardunaren lehen zatian, marko teorikoa jorratu genuen eredu pedagogikoa eta dekretuaren iturriak aztertuz. Aurrean dugun lana ez dela "hutsean" eraki behar azpimarratu genuen, urteak bait daramatzagu konpetentziak, metodologia eragileak edo errubrika hitzak eta kontzeptuak entzuten, ezagutzen eta, neurri batean, aplikatzen gure ikastetxeetan. Hale ere, dokumentu berriak irakurtzearen eta barneratzearen beharra funtzezkoa da. Zentzu horretan, taldekideekin trukatzea iritziak, iradokizunak eta abarrak tresna ezinhobea deritzogu klaustroetan hausnarketa sustatzeko eta komuneko oinarriak ezartzeko. Hiztegi komuna izatea abiapuntua izan daiteke eta, horretarako, Hezkuntza Departamentuko web orrian jarritako glosarioa lagungarria izan daiteke.

Bestalde, saioa diseinatzen hasi ginenean, dinamikak erabitzea, hausnarketa sustatzea eta elkarlana helburutzat hartu genituen. Transmisio ereduak baztertu nahi baditugu ezinbestekoa da aholkulariok ere aktiboak diren eredu metodologikoak erabiltzea eskaintzen ditugun formazio-saioetan. Batzutan, eredu honek "desoreka" sor dezake. Eta desorekak onak dira eraldaketa sustatzeko, gure praktikak kolokan jartzeko eta, horren ondorioz, agian, praktika berriztatzeko erabakiak hartuko dira. Gainera, erabilitako dinamikak eta teknikak ikasgeletan edota irakasleen bileretan erabilgarriak izan daitezkeela pentsatzen dugu.

Saioaren hasieran, prozedura ezarri genuen batzarrari etekina ateratzeko (seinalea adostu genuen talde-lana uzteko eta zetorren ataza burutu ahal izateko, adibidez). Banandutako post-it-etan, ideiak, galderak eta iruzkinak jartzeko konsigna eman genuen "foro analogikoa"n utz zitzaketela adieraziz.

Ondoren, aurrezagutzak azalaratzeko, 1-2-4 teknika erabili genuen. Bigarren zatian, kafea eta gero, lauko taldeetan elkartu ziren eta unitate didaktikoaren edukiera, atalez atal, azaldu genuen adibideak eta ereduak ematen. Guk diseinatutako txantiloia bete zuten elkar lanean. Bazeramaileek taldekideen ekoizpenak partekatu zituzten eta bide batez, taldeetan sortutako ideiak "eramateko" aukera izan genuen guztiok. Bestalde, baliabideak ordenatzeko, lehenesteko eta gordetzeko baita zentroen ekoizpenak partekatzeko ere, sortu dugun Heziberri 2020 sitea aurkeztu genuen. Bertan, jardunaren aurkezpena, txantiloiak eta argazkietan eginiko dokumentazioa daude eskura.

Amaitzeko, "artile sarea" sortu genuen saioaren gure azken xedea irudikatzeko: Barakaldoko lehen hezkuntzan aritzen diren irakasleen lan-sarea sortzeko gonbidapena luzatzea. Irakasle lana doitzearen erronkaren aurrean, kooperazioa eta eskuzabaltasuna izan daitezke (badira) arrakastaten gakoak. Baliabideak, praktika onak, zalantzak, eskaerak partekatzeko, Twitter-en hashtag  hau  #LHberriztatzen_ B04 zabaldu (eta erabiliko) dugu. 

 

Elkarrizketak, elkar-lanak, ezagutza adierazi eta partekatzeak, hau da, guztion adimenak jokoan jartzeak lagunduko digu ikaste-irakaste prozesua egokitzen eta aberasten ikasleek, mende honetan, behar duten formazioa jaso ahal izateko.

Twitter-en aurkituko gaituzue:

@bertamares
@susanalobela

Bidaia hasi da...